Yoxa çıxan təyyarənin qalıqları tapıldı - İrkutskda

İyulun 1-də səhər saatlarında Rusiyanın İrkutsk vilayətində yoxa çıxan, FHN-ə məxsus "İl - 76" təyyarəsinin qalıqları Kaçuq rayonunda aşkarlanıb. Avtosfer.az Rusiya mətbuatına istinadən verdiyi xəbərə görə, bu barədə bölgə hökumətindən bildirilib. "Təyyarənin arxa hissəsi və digər fraqmentləri aşkarlanıb", - deyə mənbə bildirib.  

Təyyarənin qəza nəticəsində tamamilə parçalandığı və yandığı bildirilir: "Saat 2 radələrində (Bakı vaxtilə 3 radələrində) Rıbnıy Uyan yaşayış məntəqəsindən 4 km cənubda, təpənin yamacında FHN-ə məxsus yoxa çıxan  "İl - 76" təyyarəsi aşkarlanıb. Təyyarə tamamilə parçalanıb".

Qeyd edək ki,  həmin təyyarə meşə yanğınlarının söndürülməsində iştirak edib. Onunla əlaqə  iyulun 1-də səhər saatlarında itib. Qəzanın səbəbləri hələlik məlum deyil.

Məlumata görə, təyyarənin göyərtəsində 10 nəfər olub.