Həbs olunan gənc hərbi xidmətə aparılırmı? - QANUN NƏ DEYİR? - FOTO

Hərbi xidmətə çağırış mövsümündə minlərlə gənc Səfərbərlik və Hərbi Xidmətə Çağırış üzrə Dövlət Xidmətinə müraciət edir.
Avtosfer.az xəbər veriri ki, onların arasında əvvəllər məhkumluq həyatı yaşamış şəxslər də olur. Bəs bu halda prosedur necə tənzimlənir? Məhkumluğu olan bir şəxs digər çağırışçılar kimi xidmətə göndərilə bilərmi, yoxsa bu vəziyyət onun hərbi xidmətə qəbuluna mane olur?
Məsələyə hüquqi baxımdan yanaşdıqda, burada həm təhlükəsizlik, həm də qanunvericilik aspektləri nəzərə alınmalıdır. Kimlər üçün bu məhdudiyyət qüvvədədir, kimlər isə istisna sayılır?

Mövzu ilə bağlı hüquqşunas Ramil Süleymanov saytımıza açıqlamasında bildirib ki, “Hərbi xidmət keçmə haqqında” qanunda konkret şəkildə qeyd olunmayıb ki, məhkumluğu olan və ya məhbus həyatı yaşamış şəxslərin hərbi xidmətə çağırılması qadağandır:
“Yəni qanunvericilikdə belə bir məhdudiyyət nəzərdə tutulmayıb. Lakin hərbi xidmətə çağırış zamanı vətəndaş haqqında müvafiq məlumatlar toplanarkən onun məhkumluğu, məhkumluğunun ödənilməsi və ya götürülməsi ilə bağlı məlumatlar da şəxsi işinə əlavə olunur. Bu səbəbdən, həmin məlumatlar əvvəlcədən çağırışçının xidmət edəcəyi hərbi hissəyə təqdim edilir ki, şəxsin vəziyyəti barədə ciddi nəzarət həyata keçirilsin”.
Hüquqşunas qeyd edib ki, eyni zamanda, əgər hərbi komisarlıq tərəfindən çağırışçının psixoloji vəziyyəti ilə bağlı hər hansı narahatlıq aşkarlanarsa, bu halda aidiyyəti qurumların rəyləri və mövqeləri nəzərə alınmaqla onun hərbi xidmətə göndərilməsi barədə qərar qəbul edilir:

“Hərbi xidmət zamanı isə məhkumluq keçmiş şəxslərlə bağlı hər hansı ayrı-seçkilik mövcud deyil. Azərbaycan Respublikasının Konstitusiyasının 25-ci maddəsinə əsasən, hər kəs bərabərlik hüququna malikdir və heç kəs keçmişdə baş vermiş hadisələrə görə ayrı-seçkiliyə məruz qala bilməz. Buna görə də qanun hər kəsə eyni qaydada tətbiq olunur və məhkumluğu olan şəxslərə münasibətdə də eyni hüquqi prinsiplər qüvvədədir”.

Fidan