Keçilməz yolları olan qəsəbə - Palçıq, gölməçə, çuxur ... - VİDEO

Abşeron rayonunun Qobu qəsəbəsində yolların keçilməz vəziyyətdə olması sakinlərin narazılığına səbəb olub. Avtosfer.az-ın Oxu.az-a istinadən məlumatına görə, bununla bağlı sosial şəbəkələrdə videogörüntülər yayılıb.

Qeyd olunub ki, xüsusilə yağıntılı hava şəraitində yollar palçıqla örtülür, gölməçələr əmələ gəlir, nəticədə nəqliyyat vasitələrinin və piyadaların hərəkəti çətinləşir.

"Yollar keçilməz vəziyyətdədir. Bir çox ərazilərdə vətəndaşlar öz vəsaitləri hesabına müəyyən işlər görməyə çalışıblar, amma aidiyyəti qurumlar tərəfindən hər hansı addım atılmır", - deyə şikayətdə qeyd olunur.

Abşeron Rayonu İcra Hakimiyyətindən bildirildi ki, sözügedən ərazilər Səməd Vurğun və Səməd Ağamalıoğlu küçələridir:

"Kommunal xidmət qurumları tərəfindən həmin küçələrdə müvafiq təmir işləri aparılıb. Təmir işləri başa çatandan sonra havaların düzəlməsi gözlənilir ki, əraziyə asfalt vurulsun. Yağmurlu hava şəraiti bitdikdən sonra asfalt vurulması üçün əlverişli olduğu zaman sözügedən küçələr əvvəlki formasına qaytarılacaq".