Otuz mindən çox insanın əziyyət çəkdiyi yol - Müraciətə baxan yoxdur - VİDEO

Uzunluğu 22 kilometr olan Qaraməryəm-Müsüslü avtomobil yolunda nəqliyyat vasitəsini idarə etmək sürücülər üçün olduqca çətinləşib. Ötən əsrin 80-ci illərində çəkilən ikizolaqlı yol hazırda bərbad vəziyyətə düşüb. Sözügedən yol Göyçayın mərkəzini kəndlərlə birləşdirməklə yanaşı, bir sıra istiqamətlər üçün də alternativ marşrut rolunu oynayır.

Avtosfer.az xəbər verir ki, sakinlər İctimai TV-yə bildiriblər ki, bu yolun ətrafında 30 mindən çox əhali yaşayır.

Onların sözlərinə görə, yolun təmiri ilə bağlı dəfələrlə müraciət etsələr də, indiyədək heç bir nəticə əldə olunmayıb.

Məsələ ilə bağlı Azərbaycan Avtomobil Yolları Dövlət Agentliyindən (AAYDA) bildirilib ki, qurum yolun mövcud vəziyyətindən xəbərdardır.

Qeyd olunub ki, yolun yenidən qurulması ilə bağlı layihə hazırlanıb və hazırda təsdiq mərhələsini gözləyir.