Sosial şəbəkələrdə "ucuz yaxta turu" tələsi: Vətəndaşlar nəyə diqqət etməlidir?

Cəmi 100 manat qarşılığında yaxta gəzintisi və ya dənizdə səhər yeməyi təklif edən sosial media səhifələri vətəndaşların diqqətini cəlb edir. Bu səhifələr insanları tələyə salaraq əvvəlcədən ödəniş tələb edir. Pul köçürüldükdən sonra isə ya əlaqə kəsilir, ya da belə bir xidmətin ümumiyyətlə mövcud olmadığı üzə çıxır.

Bu kimi problemlərlə üzləşməmək üçün vətəndaş hansı nüanslara diqqət etməlidir?

Avtosfer.az-ın məlumatına görə, mövzu ilə bağlı Redaktor.az-a danışan Azərbaycan Turizm Agentlikləri Assosiasiyası İdarə Heyəti sədrinin müşaviri Müzəffər Ağakərimov bildirdi ki, bu tip təkliflərlə qarşılaşan vətəndaş ilk növbədə tələsmədən məlumatın doğruluğunu mütləq aidiyyəti dövlət qurumlarından dəqiqləşdirməlidir:

"Konkret olaraq yaxta ilə bağlı təqdim olunan məlumatların həqiqiliyini öyrənmək üçün Dəniz Gəmiçiliyi İdarəsinə və Dənizkənarı Bulvar İdarəsinə rəsmi sorğu göndərərək və ya birbaşa müraciət edərək dəqiq informasiya əldə etməsi vacibdir. Bu, mümkün dələduzluq hallarının qarşısının alınması baxımından mühüm əhəmiyyət daşıyır. Əgər vətəndaş artıq həmin təklif əsasında hər hansı ödəniş edibsə və aldadıldığını düşünürsə, vaxt itirmədən hüquq-mühafizə orqanlarına müraciət etməli, mövcud yazışmaları, ödəniş qəbzlərini və digər sübutları təqdim etməlidir. Bu, hadisənin araşdırılması və hüquqi tədbirlərin görülməsi üçün vacib addımdır".