Avtomobil idarə etməyi hansı təlimçilərdən öyrənmək lazımdır? - Hər təlimçiyə İNANMAYIN

"Qadın sürücülərlə bağlı vəziyyət getdikcə düzəlir. Həmçinin qadın təlimçilərə müraciət edənlərin sayı da çoxalır”. Bunu Sfera.az-a açıqlamasında nəqliyyat məsələləri üzrə ekspert Elməddin Muradlı deyib. O bildirib ki, baş verən qəzalar,  yol-nəqliyyat hadisələri qadınları ehtiyatlı olmağa vadar edir: "Lakin bəzən qadınlar təcrübəsiz, savadsız təlimçilərə rast gəlir və nəticədə öyrəndiklərini yolda tətbiq edən zaman əks effekt yaranır. Düşünürəm ki,  ölkə başçısı tərəfindən təsdiq edilmiş "Yol hərəkətinin təhlükəsizliyinə dair 2019–2023-cü illər üçün Dövlət Proqramı”na uyğun olaraq, təlimçilərin özlərinə də təlim keçmək lazımdır. Onlar tam olaraq sertfikatlaşdırılmalıdır. Kimlər təlimçi ola bilər, kimlər yola verməklə məşğuldurlar, bax bu, üzə çıxmalı, təlimçilər peşəkar olmalı, vaxtlı-vaxtında imtahandan keçirilməlidirlər. Bu gün yollarda təlimçilər tərəfindən yola çıxarılan xanım sürücülər görürəm. Həmin xanımlar təlimçilərdən yaxşı maşın sürürlər. Təlimçilər isə əllərində telefonla video çəkməklə məşğuldurlar, təlim də kənarda qalıb. Biabırçı mənzərə müşahidə edilir”.

Müsahibimiz qeyd edib ki, artıq xanım və kişi sürücü anlayışını kənara qoymaq lazımdır: "Sürücü elə sürücüdür. "Yol hərəkəti haqqında" qanunda bütün hüquqlar, vəzifələr bərabərdir. Yalnız qanunda qadın sürücülərə bir üstünlük verilir – hamilə olduqda təhlükəsizlik kəmərindən istifadə etməyə bilərlər. Düzdür, dünyanın bir çox ölkələrində heç bu cür maddə yoxdur. Onlar hesab edir ki, hamilə qadınlar da təhlükəsizlik kəmərindən istifadə etməlidirlər. Bəzi ölkələr hamilə qadınların maşın sürməsini qadağan edir ki, avtomobil  idarə etmək stress yaradır və bu da dünyaya gələcək uşağa zərər vura bilər. Fərqli yanaşmalar var. Hazırda Azərbaycanda qadın sürücülərin sayı 60 mini ötüb. Söhbət sürücülük vəsiqəsi alanlardan gedir. Təxminən 30-40 min arası xanım sürücü maşın idarə edir. Düşünürəm  ki, bu hələ kiçik rəqəmdir. Vaxt gələcək yəqin ki, bu rəqəm kişi sürücülərə bərabər səviyyəyə gəlib çatacaq. Azərbaycanda vaxtilə trolleybus, tramvay, metro sürən qadınlar olub. Bu baxımdan bu gün də taksi fəaliyyəti ilə məşğul olan xanımlara rast gəlirik”.