Bakıda bu avtobuslarda kondisioner problemi var - AYNA XƏBƏRDARLIQ ETDİ

Bakıda 67 nömrəli avtobusla bağlı şikayətlər artmaqdadır. Sərnişinlər bildirirlər ki, bu avtobuslarda havalandırma, kondisioner işləmir. Bu isə yay ayları üçün sakinlərə çətinlik törədir.

Bununla bağlı tədbir görülürmü?

Avtosfer.az xəbər verir ki, mövzu ilə bağlı "redaktor.az" Azərbaycan Yerüstü Nəqliyyat Agentliyinə (AYNA) sorğu göndərib. Sorğuya cavab olaraq bildirildi ki, 67 nömrəli marşrutda “Daewoo BS90” markalı avtobuslar istismar edildiyindən bu avtobuslarda kondisioner yoxdur.

"AYNA tərəfindən daşıyıcılara istismarlarında olan xətlər üzrə avtobusların yenilənməsi barədə tapşırıqlar verilir və mütəmadi nəzarət tədbirləri həyata keçirilir. Sözügedən marşrut xəttinin daşıyıcısına da avtobusların yenilənməsi barədə xəbərdarlıq edilib. Eyni zamanda qeyd edək ki, sərnişindaşıma xidmətinin keyfiyyətinin artırılması istiqamətində işlər davam etdirilir. Avtobus parkının yenilənməsi mərhələli qaydada həyata keçirilir. Marşrut şəbəkəsi və ictimai nəqliyyatın fəaliyyəti təhlil edilir, şəbəkə yenidən formalaşdırılaraq marşrutlar mərhələli qaydada müsabiqəyə çıxarılır", - deyə AYNA-nın cavabında deyilir.