"BakuBus"dan istifadə edənlərin nəzərinə - Avtobus 20-25 dəqiqədən gec gələrsə... - VİDEO

Sərnişinlər 46 saylı marşrut xətti üzrə hərəkət edən avtobusların intervalından narazıdırlar.  

Avtosfer.az xəbər verir ki, bu barədə şikayət “Baku.ws”in "qaynar xətti"nə daxil olub.

Bildirilib ki, metronun "28 May" stansiyasının yaxınlığından xəttə çıxan 46 saylı marşrutlar burada uzun müddət gözləyir. Avtobuslar sərnişinlə dolmamış hərəkət etmirlər.

Məsələ ilə bağlı "BakuBus" MMC-yə müraciət etdik. Qurumun mətbuat xidmətindən bildirildi ki, "BakuBus" MMC-nin istismarında olan 46 nömrəli müntəzəm marşrut xətti üzrə interval 7-8 dəqiqə təşkil edir. Marşrut pasportuna əsasən xətt üzrə 20 avtobus fəaliyyət göstərir:

"Bununla belə, monitorinq mərkəzinin qeyd etdiyiniz tarix üzrə apardığı müşahidələrə əsasən, xüsusilə pik saatlarda intervalın 7-15 dəqiqə arasında dəyişdiyi müəyyən edilmişdir".

Həmçinin qurum sərnişinlərdən xahiş edir ki, pik saatlarda yaranan bu dəyişikliklərə anlayışla və səbirlə yanaşsınlar.

"Əgər gözləmə müddəti 20-25 dəqiqədən artıq olarsa, bu barədə BakuBus-un rəsmi sosial media səhifələrində bizə məlumat verməklərini xahiş edirik", - deyə məlumatda vurğulanıb.