Gölməçəli yollarda xarab olan maşınlar - Sürücülər dəymiş ziyanı kimdən tələb etsinlər?

Ötən  gün yağan güclü yağış Bakıda bir sıra fəsadlara səbəb oldu. Paytaxtın bəzi ərazilərində yolları su basdı. Yollardakı subasmalar və iri gölməcələr nəticəsində bəzi fərdi avtomobillərə ciddi ziyan dəydi, içinə su doldu, mühərriki sıradan çıxdı və s. Belə olan halda həmin avtomobillərin sahibləri onlara dəyən zərərə görə kimə müraciət etməlidirlər? Ümumiyyətlə dəyən zərərin qarşısı hansı hallarda ödənilə bilər?

Avtosfer.az xəbər verir ki, məsələ ilə bağlı modern.az-ın suallarını cavablandıran hüquqşünas Ərşad Hüseynov deyib ki,  qanunvericilik - Mülkü Məcəllə və “Yol hərəkəti haqqında”   qanun dəyən zərərə görə təzminat tələb etmək hüququ verir. “Yol hərəkəti haqqında” qanunun 36-cı maddəsinin III bəndinin 1-ci hissəsində qeyd olunur ki, yol hərəkəti iştirakçılarının təhlükəsiz və rahat yol hərəkəti şəraitinə malik olmaq, yolların, küçələrin, meydanların və dəmiryol keçidlərinin hərəkətin təhlükəsizliyi tələblərinə uyğunsuzluğu nəticəsində dəymiş zərərin ödənilməsini tələb etmək hüququ var. Həmin bəndin 2-ci hissəsinə görə, sürücülərin Azərbaycan Respublikasının müvafiq icra hakimiyyəti orqanları və yol sahibləri qüvvədə olan qanunvericiliyi pozduqda, onların hərəkətlərindən (hərəkətsizliklərindən) inzibati qaydada və məhkəməyə şikayət etmək, 3-cü hissəsində  isə hidrometeorologiya, yol, kommunal və başqa təşkilatlardan yol hərəkəti şəraiti haqqında məlumat almaq hüquqları vardır. Sadəcə olaraq tələb olunur ki, həmin ziyanları qeydə almaq lazımdır. Qeydə almaq üçün də iki məsələyə diqqət etmək lazımdır:

birincisi konkret qeydə alınmalıdır ki, həmin yolu su basması yolda çala olması və başqa tələblərə, standartlara uyğun olmaması səbəbindən baş verib;

ikinci də həmin ziyanın məbləği hesablanmalıdır.

Dəqiq olmalıdır ki, avtomobilin mühərrikinə su dolub, salonuna zərər dəyib və ya başqa hissəsində problem var, onun təmiri üçün tələb olunan filan miqdarda pul lazımdır. Bunlar fiksə olunmaldır, fiksə olunduqdan sonra ikininci bir məsələ aydınlaşdırılmalıdır ki, həmin yol təsərrüfatındakı bu bərbad vəziyyətə görə hansı qurum məsuliyyət daşıyır və həmin quruma qarşı iddia qaldırılmalıdır. Düşünürəm, bizim sürücülər haqlarını tələb etmək üçün iddia qaldırmalıdır ki, durumun ciddiliyi görünsün. Qurumlar görsünlər ki, onların təqsiri ucbatından bu məsələlər baş verirsə, özləri həm də əlavə ziyana düşürlər”.

Ə.Hüseynov deyib ki, su basmış yoldan keçdiyinə görə avtomobilinə dəyən zərərlə bağlı hansısa qurumlar haqda iddia qaldıran vətəndaş qarşısına cıxmayıb: “Bəlkə də bərbad vəziyyətdə olan yoldan keçdiyinə görə problem yaşayan hansısa zərərçəkən sürücü iddia qaldırıb, amma mən elə adamlarla qarşılaşmamışam. Məndə məlumatlar var ki, yolda çala olub, açıq kanalizasiya lyuku olub, maşın ora düşərək zədələnib, sahibi onunla bağlı iddia qaldırıb. Amma su basmış ərazilərdən keçərkən avtomobilinə zərər dəyənlərlə bağlı məlumatım yoxdu. Halbuki belə iddialar qaldırılsaydı, yaxşı olardı”.

Eksert deyib ki, dünənki yağışlar zamanı avtomobillərin dağıntı altında qalması ilə bağlı məsələ də araşdırılmalıdır: “Burada yol hərəkətində iştirakdan söhbət getmir. Sadəcə olaraq tikilinin ucmasından söhbət gedir. Araşdırmaq lazımdır ki, kimin təqsiri var və ya yoxdur. Bəlkə burada elə bil amil var ki, həmin hasarın sahibinə də aid deyil. Konkret müəyyən olunsa ki, həmin hasar nəzərdə tutulan standartlara, təhlükəsizlik tələblərinə əməl olmadığına görə uçub, ziyan dəyib, onda hasarı tikmiş və ya onu istifadə edən adama qarşı iddia qaldırmaq olar. Hər halda bu məsələ avtomobilin su basması nəticəsində zərər görməsi ilə eyni deyil”.

Ərşad Hüseynovun sözlərinə görə, hadisələrin heç birinin icbari sığorta ilə əlaqəsi yoxdur: “Əgər avtomobilin kasko sığortası varsa o halda dəymiş ziyan ödənilməsi ilə bağlı tələblər irəli sürülə bilər. Daha doğrusu sığorta qanununa görə, sığorta şirkətləri bunun qarşılığını ödəməlidir”.