Mümkün deyil, sürüşkən material yoxdur - İradlara rəsmi reaksiya

Bir həftədir ki, davam edən qarlı hava şəraiti ilə bağlı olaraq paytaxtın bir çox ərazilərində yerləşən yeraltı keçidlərlə bağlı müxtəlif şikayətlər səsləndirilir.

Avtosfer.az xəbər verir ki, vətəndaşlar bu barədə sosial şəbəkələrdə yazaraq yeraltı keçidlərdə sürüşkən materiallardan istifadə edildiyini bildirirlər.

Paytaxt sakinlərinin sözlərinə görə, sürüşkən material qarlı hava şəraitində yeraltı keçidlərdən istifadə edən piyadaların yıxılmasına və xəsarət almasına səbəb olur.

Sözügedən iradlarla bağlı Ölkə.az-a danışan Azərbaycan Avtomobil Yolları Dövlət Agentliyinin (AAYDA) mətbuat xidmətinin rəhbəri Anar Nəcəfli piyada keçidlərində sürüşkən material olmadığını söyləyib:

“Mümkün deyil ki, yeraltı keçiddə sürüşkən materialdan istifadə edilsin və bilərəkdən insanları orada yıxsınlar. Yağan qarın təsirindən sürüşkən ola bilər. Bu, başqa məsələdir. Hətta yeraltı keçidlərə mərmər vurulsa belə, onun üzəri işlənilir ki, sürüşkən olmasın. Əgər sürüşkən hissələr varsa da, üzərinə xüsusi rezinli xətlər qoyulur və yaxud da metlaxın üzərində xətlər vulur. Bu məsələlər nəzərə alınır”, - deyə o əlavə edib.