Sakinlərin evlərini yağış SULARI BASDI: Şikayətə baxan yoxdur - VİDEO

Yağış suları paytaxtın Xəzər rayonu Buzovna qəsəbəsinin sakinlərinin işini çətinləşdirib.

Avtosfer.az xəbər verir ki, bu barədə "Xəzər Xəbər"ə müraciət edən vətəndaşlar yaşadıqları ərazidə kanalizasiya sisteminin olmamasından və bu səbəbdən həyətlərini, evlərini, zirzəmilərini su basmasından şikayətçidirlər.

Sakinlər onu da bildirirlər ki, dəfələrlə adiyyəti qurumlara müraciət etsələr də, nəticəsi olmayıb. Onlar ərazidən yağış sularının çəkilməsi və kanalın təmizlənməsi üçün öz hesablarına işlər görsələr də, indi vəziyyət daha da çətinləşib. Buna görə də problemi həll etməkdə aciz qalıblar.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, hazırda qeyd olunan ünvanda yığılan suyun çəkilməsi mərkəzləşmiş şəbəkə olmadığına görə çətinləşir.

Qurumdan o da bildirildi ki, mərkəzləşdirilmiş su təchizatı və kanalizasiya sistemi mövcud olmayan ərazilərdə su təchizatı və kanalizasiya sistemlərinin qurulması məqsədilə müvafiq layihə sənədləri hazırlanıb. Layihələrin icrası su təchizatı sisteminin mövcudluğu, texniki vəziyyəti və digər amillər nəzərə alınmaqla mərhələlərlə həyata keçirilir.

Ətraflı videomaterialda.