Avtobusların nə vaxt gələcəyini əvvəlcədən biləcəyik - YENİLİK

Azərbaycan Yerüstü Nəqliyyat Agentliyi (AYNA) ictimai nəqliyyatda nağdsız ödəniş və yeni mobil tətbiqləri istifadəyə hazırlayır.

Belə tətbiqlərdən biri də hazırda test mərhələsində olan "MaaS" (Mobility as a Service) tətbiqidir. Mobil tətbiq vasitəsilə istifadəçilər avtobusların gəliş vaxtını real zaman rejimində izləyə biləcəklər.

Avtosfer.az xəbər verir ki, bu barədə modern.az-ın sorğusuna cavab olaraq agentlikdən bildirilib.

Qeyd edilib ki, AYNA "MaaS" (Mobility as a Service) mobil tətbiqi sayəsində istifadəçilər avtobusların gəliş vaxtını real zamanda izləyə biləcəklər.

"Bu yenilik ictimai nəqliyyatda şəffaflıq və rahatlığı artıraraq sərnişinlərin vaxtına qənaət etməyə imkan verəcək. Hazırda layihənin beta-versiyası test olunur. Sınaqlardan sonra tətbiq ictimaiyyətin ixtiyarına veriləcək", - deyə qurumdan verilən açıqlamada qeyd olunub.

Agentlik bildirir ki, sərnişinlərə göstərilən xidmət keyfiyyətinin artırılması və vətəndaş məmnunluğunun təmin edilməsi məqsədilə hazırda AYNA tərəfində innovativ həllər üzərində iş aparılır.