Azərbaycanda kombayn istehsalı başladı – FOTO

“Gəncə Avtomobil Zavod”unda “Belarus” traktorlarının bazasında mini pambıqyığan kombaynların istehsalı üçün sınaq işlərinə başlanılıb.

Avtosfer.az-ın “marja”ya istinadən verdiyi xəbərə görə, zavodun direktoru Kamran Nəzərov bildirib ki, bu kombaynlar fermer üçün olduqca əlverişli olacaq:

“Pambıq yığımı cəmi 2 ay davam edir və ilin qalan 10 ayı ərzində kombaynlar istifadəsiz qalır. Nəzərə alsaq ki, Avropa ölkələrindən alınan pambıqyığan kombaynların qiyməti təxminən 400 min manatdan bahadır, görün nə qədər vəsait lazım olur.

Odur ki, belə qərara gəldik ki, “Belarus” traktorlarının bazasında mini kombaynların yığımına başlayaq. Bunun üçün Belarusun “QomSelmaş” zavodundan gətirdiyimiz kombaynın pambıqyığan aqreqatını “Belarus” traktorunun arxa hissəsinə uyğunlaşdırdıq. İlk sınaq uğurlu oldu və fermerlər kombayınların keyfiyyətindən razılıqlarını ifadə etdilər.

Pambıq yığımı başa çatdıqdan sonra pambıqyığan aqreqat sökülərək növbəti yığıma saxlanılacaq və traktor digər kənd təsərrüfatı işlərinə cəlb ediləcək”.