Dayanacaqlarda xüsusi məlumat lövhələri olacaq - FOTO

“Yol hərəkəti haqqında” Azərbaycan Respublikası Qanununun tətbiq edilməsi barədə” Azərbaycan Prezidentinin fərmanına dəyişikliklər edilməsi haqqında Prezidentin 23 iyun 2016-cı il tarixli fərmanı ilə yollarda yol nişanlarının qurulması və onların lazımi vəziyyətdə saxlanılmasına nəzarət müvafiq dövlət qurumları, o cümlədən Bakı Nəqliyyat Agentliyi tərəfindən həyata keçirilir. Bu baxımdan, Bakı Nəqliyyat Agentliyi ictimai nəqliyyatda xidmət səviyyəsinin artırılması, əhalinin şəhərdaxili avtobuslardan istifadəsinin daha da yaxşılaşdırılması, eləcə də əlavə vaxt itkisinin qarşısının alınması istiqamətində tədbirlərini davam etdirir. Agentliyin İctimai əlaqələr və maarifləndirmə şöbəsinin müdiri Nuridə Allahyarova Avtosfer.az-a bildirib ki, bu çərçivədə tətbiq edilən yeniliyə əsasən, hər bir dayanacaqda xüsusi məlumat lövhələri quraşdırılacaq. Lövhələrdə dayanacağın yerləşdiyi küçə və prospektdən keçən marşrut xətləri, avtobuslararası interval, həmçinin hər bir marşrut xətti üzrə mövcud dayanacaqlar barədə məlumat əldə etmək mümkündür. 

İlkin mərhələdə bu tip məlumat lövhələrinin paytaxtın əsas küçə və prospektlərində quraşdırılmasına başlanılıb. Qısa vaxtda isə Bakı şəhərinin inzibati ərazisində mövcud olan əksər dayanacaqlarda yeni məlumat lövhələrinin quraşdırılması təmin ediləcək.

Elmin