İctimai nəqliyyatda "brutto müqavilə" sistemi - "Qazanan tərəf sərnişinlər olacaq"

Bakı və Abşeron ərazisində ictimai nəqliyyat xidmətlərinin keyfiyyətini davamlı olaraq yüksək səviyyədə saxlamaq və avtobus parkının yenilənməsi üçün, dayanıqlı maliyyələşdirmə mexanizmini formalaşdırmaq məqsədilə "brutto müqavilə"  sistemi tətbiq ediləcək.

Bəs "brutto müqavilə" sistemi nəqliyyat sahəsi üçün nə vəd edir?

Nəqliyyat eksperti Eldəniz Cəfərov öncə "brutto müqaviləsi"nin məğzini izah etdi:

""Brutto müqaviləsi"nin əsas məğzi ondan ibarətdir ki, dövlət daşıyıcı şirkətlərə müəyyən maliyyə yardımını edir, subsidiyanı verir və bunun müqavilində daşıyıcı şirkətlər ictimai nəqliyyatda sərnişinlərin təhlükəsiz, keyfiyyətli və vaxtında daşınmasını həyata keçirməlidirlər".

Ekspertin sözlərinə görə, bu müqavilədə ən çox qazanan tərəf sərnişinlər olacaq.

"Vaxtında mənzil başına çatmaq imkanları daha da artacaq. Həmçinin daşıyıcı şirkətlər də özlərinin maliyyə təminatlarını artıq əsaslandıra biləcəklər. Maliyyə təminatı olduğuna görə də daha həvəslə yeni avtobusların alıb gətirilməsini və yüksək keyfiyyətli xidmət təşkil etməyi həyata keçirə biləcəklər", - deyə Eldəniz Cəfərov yekunlaşdırdı.(redaktor.az)