“Uçan marşrut taksilər” istifadəyə veriləcək - 2030-cu ildə

Çinin “EHang” startapı əmindir ki, beş ildən sonra Çin üzərində səmada “marşrut taksilər” uçacaq və bəzi şəhərlərdə infrastruktur yaradılacağı təqdirdə əhali onlardan istifadə edə biləcək.
Avtosfer.az “South China Morning Post”a istinadla xəbər verir ki, bu barədə “EHang”ın maliyyə direktoru Konor Yan Çin nəşrinə müsahibəsində bildirib.
O deyib: “İnanıram ki, 2030-cu ilə qədər Çində uçan taksilər olacaq. Ola bilsin ki, bəzi böyük şəhərlərdə uçuş zolaqları kimi infrastruktur varsa, hava taksi xidmətləri də fəaliyyət göstərə bilər”. Xatırladaq ki, “EHang” bu ilin sonuna qədər Quançjou və Hefeydə turistlərin görməli yerlərə getməsi üçün EH216-S elektrik təyyarəsindən istifadə etməyi planlaşdırır, lakin bu səfərlər ciddi şəkildə müəyyən edilmiş marşrutlar üzrə həyata keçirilir. Uçuş məsafəsi 30 kilometrə çata bilər, maksimal sürət isə saatda 130 kilometrdir. EH216-S təyyarəsi Çində 331 min dollara başa gəlir və iki sərnişin daşıya bilir.
“EHang” özünə yeni tərəfdaşlar tapmaqla potensialını inkişaf etdirməyi hədəfləyir. Şirkət artıq dartma batareyası istehsalçısı “Gotion” ilə tərəfdaşlığa malikdir və keçən il avtomobil istehsalçısı “Changan Automobile” ilə təyyarənin istehsalı və ona xidmət göstərilməsinə kömək etmək üçün müqavilə bağlayıb. Bu ilin sonuna qədər “EHang” istehsal gücünü ildə 300 təyyarədən 1000 ədədə çatdırmaq niyyətindədir. Şirkət ABŞ fond bazarına çıxmağı bacarıb, lakin səhmlərin hər hansı başqa platformada təkrar yerləşdirilməsini də nəzərdən keçirir. Bu ilin sonuna qədər “EHang” bir tərəfdaşla əməkdaşlıq şəraitində hazırlanmış ən azı iki batareya modelini təqdim edəcək.
Şirkətin məhsul çeşidi də genişlənəcək. “VT-30” modelindən sonra növbəti təkamül mərhələsi olacaq və orta mənzilli (300 kilometrə qədər) uçuşlar üçün nəzərdə tutulan “VT-35” bu rübdə təqdim olunacaq. Təyyarənin dizaynı uzun məsafələrdə səmərəli enerji istehlakı və artan kruiz sürəti üçün optimallaşdırılıb.
Mütəxəssislər hesab edirlər ki, “kiçik elektrik aviasiya” bazarı əvvəlcə logistika xidmətlərinə diqqət yetirəcək, çünki sərnişindaşımaları təhlükəsizlik və infrastrukturun inkişafına daha çox diqqət yetirməyi tələb edir.