Qəbələdə yol nişanı ilə bağlı narazılıq - Sakinlərin şikayəti cavabsız qalıb - VİDEO

Qəbələ şəhərinin 28 May küçəsində, Mərkəzi Cümə Məscidinin qarşısında quraşdırılmış yol nişanı sakinlərin narazılığına səbəb olub.

Bu barədə izləyicilərdən biri Avtosfer.az-a müraciət edərək “Whatsapp” vasitəsilə video göndərib. Məlumata görə, dayanma və durmanı qadağan edən nişan yolun sol tərəfində yerləşdirilib. Bu isə həmin istiqamətdə fəaliyyət göstərən ticarət obyektlərinin sahiblərinə çətinlik yaradır — yükdaşıma və malların boşaldılması mümkünsüz hala gəlib.

İzləyici bildirib ki, bu vəziyyət sürücülər üçün də narahatlıq doğurur. Sərnişin mindirən və ya düşürən avtomobillər nişanın təsir zonasında dayana bilmədiyindən qayda pozuntusu riski yaranır.

Kadrlardan göründüyü kimi, yolun sağ tərəfində dayanma və durmanı qadağan edən nişan yoxdur. Şikayətçi bildirib ki, bu hissədə avtomobillər mütəmadi park edildiyi üçün digər hərəkət iştirakçılarının həmin tərəfdə dayanması mümkünsüz olur. Eyni zamanda sağ tərəfdə səkinin olmaması piyadaların avtomobillərlə eyni yolda hərəkət etmələrinə gətirib çıxarır. Bu isə həm piyadaları, həm də sürücüləri təhlükəyə atır.

Şikayətçi qeyd edib ki, nişanın sağ tərəfə köçürülməsi üçün aidiyyəti qurumlara müraciət olunub, amma hələ cavab verilməyib.

Nərmin