Yol polisi ilə sürücüləri üz-üzə qoyan nişan: ŞİKAYƏT VAR - VİDEO

Paytaxtın Dərnəgül metrostansiyasının yaxınlığında sürücülər yol polisi əməkdaşları tərəfindən tez-tez cərimələnirlər. Redaksiyamıza müraciət edən oxuculardan biri bildirib ki, bu hal əsasən əvvəllər avtobusların son dayanacaq yeri kimi istifadə olunan ərazidə baş verir. Avtosfer.az-ın məlumatına əsasən, həmin ərazidə bir müddət əvvəl hərəkəti qadağan edən yol nişanı quraşdırılıb. Lakin sonradan bu ərazidə elektrik avtobuslarının enerji ilə təmin olunması üçün xüsusi doldurma stansiyası yaradılıb.
Hazırda bu stansiyaya daxil olan digər nəqliyyat vasitələrinin sürücüləri yol polisi əməkdaşları tərəfindən cərimələnirlər. Cərimələrin əsaslandırılması isə həmin ərazidə hərəkəti qadağan edən nişanın mövcudluğu ilə izah olunur. Yaranmış vəziyyət sürücülər arasında narazılığa səbəb olub. Elektrik avtomobili sahibləri hesab edirlər ki, enerji doldurma stansiyasından istifadə etmək onların da hüququdur. Əgər stansiya yalnız elektrik avtobusları üçün nəzərdə tutulubsa, bu barədə ərazidə konkret göstərici və əlavə izah edici nişanlar olmalıdır.
Sürücülərin müraciətlərində bildirilir ki, hazırkı vəziyyət çaşqınlıq yaradır və vətəndaşlar bilmədən cərimələnirlər. Onlar aidiyyəti qurumlardan hərəkəti qadağan edən nişanın oradan götürülməsini, yaxud əraziyə əlavə məlumatlandırıcı nişanların quraşdırılmasını tələb edirlər. Bu dəyişikliklərin edilməsi, onların fikrincə, həm qanun pozuntularının qarşısını alacaq, həm də sürücülər arasında yaranan narazılıqları aradan qaldıracaq.

Fərid