"Allah haqqı çox içməmişəm, 50-cə qram" - Reyddə maraqlı anlar - VİDEO

Sərxoş halda sükan arxasında əyləşərək özü, sərnişinləri və ətrafdakılar üçün təhlükə yaradanlar bu dəfə də yol polisi əməkdaşlarının hədəfində olub. Avtosfer.az ARB-yə istinadla xəbər verir ki, Göygöldə keçirilən reyd zamanı spirtli içki qəbul edən sürücülərlə qanun keşikçiləri arasında mübahisə də yaranıb. Yol polisinin mütəmadi profilaktik tədbirlərinə baxmayaraq, hələ də bəzi şəxslərin spirtli içki qəbul edərək nəqliyyat vasitələrini idarə etməsi hallarına rast gəlinir.

Bu görüntüləri operator Gəncə-Toğanalı avtomobil yolunun Göygöl rayonu ərazisindən keçən hissəsində çəkib. Baş Dövlət Yol Polisi İdarəsinin Yol-Patrul Xidməti Alayının xüsusi bölüyünün və 8-ci tağımın əməkdaşlarının reydi nəticəsində nəqliyyat vasitəsini sərxoş vəziyyətdə idarə edən 13 nəfər akşar olunub. Onlar inzibati məsuliyyətə cəlb edilib.

Yol polisləri həmçinin yol-hərəkəti qaydalarını pozan, avtomobili sənədsiz idarə edən sükan sahiblərinə qarşı da barışmaz mövqe tutublar. Baş Dövlət Yol Polisi İdarəsi bir daha sürücülərə yol hərəkəti qaydalarının tələblərinə ciddi əməl etməyi, xüsusən də sərxoş vəziyyətdə sükan arxasına keçməməyi tövsiyə edir.