Bakıda yoxa çıxan yol polisi işdən qovuldu - Bıçaqlanıb

Bakı Şəhər Baş Polis İdarəsinin Dövlət Yol Polisi İdarəsinin (BŞBPİDYPİ) Növbətçi Hissəsinin sürücüsü, polis serjantı Əliş Kərimov vəzifəsindən azad edilib. Bu barədə "Report"a Bakı şəhər DYP-dən məlumat verilib. Məlumata görə, Ə.Kərimovdan izahat alınıb, xidməti yoxlama aparılıb. O, vəzifə borcunu yerinə yetirərkən işinə qarşı laqeyd münasibət bəslədiyinə görə polis sıralarından xaric edilib.

Qeyd edək ki, fevralın 2-dən 3-nə keçən gecə Ə.Kərimov ona təhkim olunmuş 99-YP-460 dövlət qeydiyyat nişanlı "Kia" markalı avtomobili küçədə saxlayaraq ərazidən uzaqlaşıb. Avtomobil BŞBDYPİ-nin Növbətçi Hissəsinə məxsusdur.

Avtosfer.az-ın əldə etdiyi məlumata görə, Ə.Kərimov Növbətçi Hissədə sürücü işləyirdi. Onun xeyli miqdarda borcu olduğu, "Topaz"-da çoxlu pul uduzduğu, elə buna görə də qaçıb gizləndiyi bildirilir. Əliş Kərimov iki il əvvəl yaşadığı ərazidə bıçaqlanıbmış. Amma hadisənin səbəbi məlum deyil.