Baş Dövlət Yol Polisi İdarəsi məktəblilərlə növbəti maarifləndirici görüş keçirib - VİDEO

Baş Dövlət Yol Polisi İdarəsinin əməkdaşları tərəfindən “Sea Breeze” istirahət mərkəzində yerləşən Landau Məktəbində şagirdlərlə maarifləndirici görüş keçirilib.

Avtosfer.az xəbər verir ki, tədbirin əsas məqsədi uşaq və yeniyetmələrin yol hərəkəti təhlükəsizliyi sahəsində biliklərinin artırılması, yol hərəkəti qaydalarının təbliği, eləcə də yol-nəqliyyat hadisələrinin profilaktikası istiqamətində maarifləndirmə işinin gücləndirilməsi olub.

Görüş zamanı şagirdlərə yol hərəkəti qaydaları ilə bağlı ilkin biliklər, piyadaların və sərnişinlərin hüquq və vəzifələri, təhlükəsiz davranış qaydaları, həmçinin gündəlik həyatda yol hərəkəti təhlükəsizliyinə əməl etməyin əhəmiyyəti barədə ətraflı məlumat verilib.

İnteraktiv formatda təşkil olunan tədbir iştirakçılar tərəfindən böyük maraqla qarşılanıb. Şagirdlər onları maraqlandıran sualları ünvanlandırıb, müxtəlif maarifləndirici fəaliyyətlərdə və müzakirələrdə fəal iştirak ediblər.

Tədbir çərçivəsində məktəblilər yol polisi əməkdaşlarının xidməti fəaliyyəti ilə yaxından tanış olublar. Onlara yol polisi əməkdaşlarının funksional vəzifələri, xidmət istiqamətləri və yol hərəkəti təhlükəsizliyinin təmin olunması sahəsində həyata keçirilən tədbirlər barədə məlumat verilib.

Bununla yanaşı, şagirdlərə yol polisinin patrul xidməti avtomobili nümayiş etdirilib, onun texniki imkanları, xüsusi avadanlıqları və xidmət zamanı yerinə yetirdiyi funksiyalar izah olunub.

Maarifləndirici tədbirin sonunda şagirdlərlə xatirə şəkilləri çəkdirilib. Baş Dövlət Yol Polisi İdarəsi tərəfindən bu kimi maarifləndirici görüşlərin gələcəkdə də davam etdirilməsi nəzərdə tutulur.