Bu yola daxil olan sürücülərə sabahdan cərimə yazılacaq – FOTO - VİDEO

Martın 5-də paytaxtın Üzeyir Hacıbəyli küçəsində yol hərəkətində dəyişiklik edilib.

Avtosfer.az xəbər verir ki, bu barədə Bakı Şəhər DYP İdarəsinin və AYNA-nın birgə məlumatında bildirilib.

Qeyd edilib ki, Yusif Səfərov küçəsi ilə hərəkət edən nəqliyyat vasitələri Ü.Hacıbəyli küçəsinin sağ kənar yoluna daxil olduqda yolun mərkəz hissəsinə daxil ola bilməyəcəklər. Bununla da hərəkəti düz davam edib sağa Nizami küçəsinə yönələcəklər. Həmin ərazidə yerləşən yeraltı parkinqdən çıxan avtomobillər isə birbaşa Ü.Hacıbəyli küçəsinin mərkəz yoluna daxil ola biləcəklər.

Müvafiq nişanlar sözügedən ərazidə quraşdırılacaqdır. Yol hərəkətinin təşkilində edilən dəyişiklik Ü.Hacıbəyli küçəsində yarana biləcək sıxlıqların qarşısının alınması, ümumi istifadədə olan nəqliyyat vasitələrinin rahat və fasiləsiz hərəkətinin təmin edilməsi məqsədilə həyata keçirilir.

Qeyd edək ki, sabahdan yəni, martın 6-dan etibarən qaydalara əməl etməyən sürücülər ərazidə xidmət aparan yol polis əməkdaşları və yaxud da xüsusi texniki vasitələrin köməyi ilə aşkar edildikdə, nişanın tələbini pozma maddəsi ilə 40 manat məbləğində cərimə ediləcəklər.