“Chevrolet” sürücüsü prospektdəki kəsişmədə xidmət aparan yol polisini vurdu - VİDEO

Özbəkistanın paytaxtı Daşkənddə Dövlət Yol Polisi (DYP) əməkdaşı yol-nəqliyyat hadisəsi zamanı xəsarət alıb. Hadisə Mirzo Ulugbək küçəsində baş verib.

Avtosfer.az xəbər verir ki, qəza zamanı “Chevrolet Tracker” markalı avtomobilin sürücüsü sola dönmək istədikdə yolun kənarında xidmət aparan yol polisi inspektoruna çırpılıb. Güclü toqquşma nəticəsində Yol Təhlükəsizliyi Xİdmətinin YTX əməkdaşı qapalı sınıq və müxtəlif dərəcəli əzilmə xəsarətləri alıb.

Yaralı dərhal təcili tibbi yardım vasitəsilə xəstəxanaya yerləşdirilib. Həkimlərin sözlərinə görə, vəziyyəti stabildir və həyat üçün təhlükə yoxdur. Faktla bağlı hüquq-mühafizə orqanları tərəfindən araşdırmalara başlanılıb.

Hadisə ilə bağlı yol kənarındakı müşahidə kameralarının görüntüləri də təhlil olunur. Sürücünün yol hərəkəti qaydalarını pozması ehtimal edilir.
Bu hadisə bir daha sübut edir ki, sürücülər yolda təkcə digər nəqliyyat vasitələri ilə deyil, piyadalar və xidmət aparan hüquq-mühafizə əməkdaşları ilə bağlı da diqqətli olmalıdırlar.

Eltac Zülfüqaroğlu