DYP-dən həftəsonu səfərə çıxan sürücülərə MÜRACİƏT - VİDEO

Azərbaycan Respublikasının Daxili İşlər Nazirliyi-nin Baş Dövlət Yol Polisi İdarəsi həftəsonu paytaxt və bölgələrarası yollarda hərəkət intensivliyinin artacağını nəzərə alaraq sürücülərə müraciət edib.

Qurumdan Avtosfer.az-a verilən məlumata görə, həftəsonları səfərlərin sayının çoxalması xüsusilə avtomagistrallarda nəqliyyat sıxlığı yaradır və bu da yol-nəqliyyat hadisələrinin başvermə riskini artırır. Bildirilib ki, hərəkət təhlükəsizliyinin təmin olunması məqsədilə respublika ərazisində nəzarət-profilaktik tədbirlər gücləndirilib.

Baş Dövlət Yol Polisi İdarəsi qeyd edib ki, bəzi hallarda sürücülərin yol hərəkəti qaydalarına əməl etməməsi, texniki nasazlıq, tələskənlik və diqqətsizlik ağır qəzalarla nəticələnir.

Qurum sürücülərə səfərə çıxmazdan əvvəl avtomobillərin texniki sazlığını yoxlamağı, nasaz nəqliyyat vasitələri ilə yola çıxmamağı tövsiyə edib. Eyni zamanda sürət həddinə, ötmə və manevr qaydalarına ciddi riayət olunması, yağmurlu hava şəraitinin və yoldakı real vəziyyətin nəzərə alınması vacib hesab olunub.

Sürücülərə uzaq məsafələrə fasilələrlə hərəkət etmək, yorğun və yuxusuz halda sükan arxasına əyləşməmək çağırışı da edilib.

“Yolda intizam və məsuliyyət hər bir sürücünün təhlükəsizliyinin əsas təminatıdır”, – deyə müraciətdə vurğulanıb.