DYP-dən təhlükəli döngələrlə bağlı sürücülərə XƏBƏRDARLIQ - VİDEO

Ölkəmizin füsünkar bölgələrinə səfərlər zamanı bir sıra hallarda sərt döngəli, enişli-yoxuşlu yollar qət etməli oluruq. Dağlıq relyef üçün xarakterik olan enişli-yoxuşlu, kiçik radiuslu və ya məhdud görüntülü döngəli yol sahələrində isə hər bir sürücünün köməyinə ilk növbədə yol nişanları gəlir.

Avtosfer.az xəbər verir ki, bu barədə Baş Dövlət Yol Polisi İdarəsi məlumat yayıb.

"Xüsusilə, “Təhlükəli döngə”, “Təhlükəli döngələr”, “Sərt eniş”, “Sərt yoxuş”, “Döngənin istiqaməti” nişanları sürücünü qarşıdakı yol şəraiti haqqında əvvəlcədən xəbərdar edir, qabaqlayıcı tədbirlər görməyi tələb edir. Qalır bircə xəbərdarlığa əməl etmək. 

Unutmayaq! Yol nişanları təkcə nizamlama vasitəsi deyil, həm də təhlükəsizliyimizin qarantıdır", - deyə məlumatda qeyd olunub.

BDYPİ bir daha xatırladır ki, yol nişanları yalnız hərəkəti nizamlamaq üçün deyil, həm də sürücü və sərnişinlərin təhlükəsizliyini təmin etmək üçün nəzərdə tutulub. Təhlükəli yol sahələrində sürət həddinə riayət etmək, məsafə saxlamaq və diqqətli olmaq hər bir sürücünün əsas vəzifəsidir.