"Ekologiya postu"nun əməkdaşları qayda pozan piyadaları saxladı... - VİDEO

Baş Dövlət Yol Polisi İdarəsi tərəfindən keçirilən “Piyadalar, diqqətli olun!” şərti adlı təhlükəsizlik həftəliyi çərçivəsində avtomagistral yollarda piyada təhlükəsizliyinin təmin olunmasına yönəlmiş tədbirlər davam etdirilir.

Avtosfer.az xəbər verir ki, məlumata görə, həftəlik çərçivəsində avtomagistral yolları qanunvericilikdə nəzərdə tutulmayan yerlərdən keçən piyadalara qarşı profilaktik tədbirlər görülüb. Baş İdarənin Yol Patrul Xidməti Alayının və Ekoloji Nəzarət Bölüyünün əməkdaşları tərəfindən çoxzolaqlı yollarda özlərinin və digər hərəkət iştirakçılarının həyatını təhlükə altına atan piyadalarla maarifləndirici söhbətlər aparılıb.

Görüşlər zamanı piyadalara yol hərəkəti qaydalarına əməl etməyin vacibliyi izah olunub, təhlükəsizliyin təmin edilməsində şəxsi məsuliyyət hissinin mühüm əhəmiyyət daşıdığı onların diqqətinə çatdırılıb.

Baş Dövlət Yol Polisi İdarəsi bir daha piyadaları yalnız nəzərdə tutulmuş keçidlərdən istifadə etməyə və yol hərəkəti qaydalarına ciddi riayət etməyə çağırıb.