Kortejə qoşulan sürücü məhkəməyə üz tutdu, rəis qalib gəldi - Bakıda

Bakı Apellyasiya Məhkəməsində Bakı şəhər Dövlət Yol Polisi İdarəsinin rəisi Nüşrəvan Səfərovun apellyasiya şikayətinə baxılıb. Avtosfer.az apa-ya istinadən məlumatına görə, məhkəmə şikayəti təmin edib. Binəqədi Rayon Məhkəməsinin qərarı ləğv edilib və iş yeni baxışa qaytarılıb.

Qeyd edək ki, Binəqədi rayon Məhkəməsi Aqşin Alxazovun İnzibati Xətalar Məcəlləsinin 331-ci maddəsi ilə nəzərdə tutulmuş inzibati xəta törətməsinə dair protokolu və ona əlavə edilmiş sənədlərin Bakı şəhər Baş Polis İdarəsinin Dövlət Yol Polisi İdarəsinə geri qaytarılması barədə qərar qəbul edib. N.Səfərov isə həmin qərardan şikayət verib.

Maddə 331. Keçid üstünlüyü hüququna malik olan nəqliyyat vasitələrinə yol verilməməsi və ya mütəşəkkil nəqliyyat dəstəsinə qoşularaq hərəkət edilməsi

Xüsusi səs, qırmızı və ya göy sayrışan işıq siqnalı verən, keçid üstünlüyü hüququna malik olan nəqliyyat vasitələrinə yol verilməməsinə və ya belə nəqliyyat vasitəsinin müşayiət etdiyi mütəşəkkil nəqliyyat dəstəsinə qoşularaq hərəkət edilməsinə görə 100 manat məbləğində cərimə edilir. Eyni zamanda, 4 cərimə balı da tətbiq olunur.