Maşınından zəhərli qaz çıxan 427 sürücü cərimə olundu - FOTOLAR

Azərbaycanda Dövlət Yol Polisinin avqustun 1-dən keçirdiyi «Təmiz hava» aylığı davam edir. Avtosfer.az-ın məlumatına görə, aylıq çərçivəsində Bakı-Sumqayıt yolunda yerləşən «Ekologiya postu»nda mütəmadi tədbirlər həyata keçirilir. Dünən əməkdaşımız postda olub və burada avtomobildən ixrac olunan zəhərli qazların hansı formada ölçülməsi və sürücülərlə nə kimi iş aparılması ilə maraqlanıb. Postun komandiri, polkovnik-leytenant Fuad Mayılov bildirib ki, avqustun 1-dən 17-dək 427 sürücü barəsində inzibati protokol tərtib olunub. Həmin sürücülər arasında elələri olub ki, avtomobildən zəhərli qazların ixracı normadan 6-7 dəfə artıq olub: «Post ərazisində cərimələrin tətbiqi ilə yanaşı maarifləndirmə işləri də aparırıq. Bəzi sürücülər bu yoxlamanının mahiyyətini bilmirlər. Biz onlara izah edəndən sonra başa düşürlər və gedib avtomobildəki nasızlığı aradan qaldırırlar. Elə vaxtlar olur ki, həmin sürücülər yenidən posta gəlib maşını yoxlatdırırlar və bir növ, nümunə göstərmiş olurlar».

Postda olduğumuz müddətdə bir neçə sürücü könüllü şəkildə maşını saxlayaraq yoxlanılması üçün inspektorlara müraciət etdi. Məlum oldu ki, bu hallar tez-tez baş verir. Hər gün 5-10 sürücü posta gələrək maşını yoxlatdırır. Hansında problem varsa sürücüyə məlumat verilir və onlar da bu nöqsanları aradan qaldırırlar.

Ümumilikdə isə post komandirdi bildirdi ki, əvvəlki illərə nisbətən hazırda ekologiyaya ziyan vuran avtomobillərin sayında azalma var. Bu da sürücələrin həm maariflənməsi, həm də daha müasir avtomobillərə üstünlük verməsi ilə bağlıdır.

Elmin