Nömrəsiz və pərdəli maşın duracağa aparıldı; sürücü yol polisini şərlədi - VİDEO

Bir neçə sosial şəbəkə səhifələrində Salyan Rayon Polis Şöbəsinin Dövlət Yol Polisi Bölməsinin əməkdaşları tərəfindən vətəndaşlara qarşı qanunsuz hərəkətlər edilməsi, eləcə də pul alması barədə məlumatlar paylaşılıb. İddia olunur ki, əməkdaşlar qanunsuz olaraq avtomobili saxlayıblar, sürücüyə məxsus qızıl-zinət əşyalarını götürüblər, həmçinin sürücülərdən pul alıblar.

Məsələ ilə bağlı DİN-in Mətbuat Xidmətinin Şirvan regional qrupunun baş inspektoru, polis baş leytenantı Nizam Həmidovla Avtosfer.az-a bildirdi ki, iyunun 29-da Oktay Salayevin idarə etdiyi “VAZ-2107” markalı nəqliyyat vasitəsi arxa dövlət qeydiyyat nişanı olmadığı və avtomobildə konstruksiya dəyişikliyinə yol verildiyi üçün Salyan rayon Dövlət Yol Polisi Bölməsinin əməkdaşları tərəfindən saxlanılıb. Onun barəsində İnzibati Xətalar Məcəlləsinin müvafiq maddələri ilə protokol tərtib olunub. Lakin sürücü protokolu imzalamaqdan imtina edib. Həmin avtomobilə hal şahidlərinin də iştirakı ilə baxış keçirildikdən sonra müvəqqəti duracağa yerləşdirilib. “Nəqliyyat vasitəsindən qızıl-zinət, eləcə də digər əşyaların oğurlanması ilə bağlı səsləndirilən iddialar isə həqiqəti əks etdirmir və şər-böhtan xarakterlidir”.

Qeyd edək ki, Oktay Salayev fevral ayında da həmin avtomobillə yol-hərəkəti qaydalarını pozduğu üçün onun barəsində bir neçə dəfə inzibati protokol tərtib olunub. İnzibati xətaya görə təyin edilən cərimələri ödəmədiyindən onun 240 manat cərimə borcu yaranıb.

Bundan əlavə yol polisi əməkdaşlarının sürücülərdən pul almasına dair videogörüntülər də paylaşılıb. Həmin görüntülər bir müddət əvvvəl çəkilib və görüntülərlə bağlı araşdırmalar aparılıb. Vətəndaşın qış geyimində olması kadrların yeni olmamasından xəbər verir.

Emin