Polislər püşkatma yolu ilə vəzifələrə təyin olundular

Avqustun 24-də Daxili İşlər Nazirliyində ötən tədris ilində Polis Akademiyasının əyani şöbəsi məzunlarının Bakı Şəhər Baş Polis İdarəsinin orqan və hissələrində vakant olan zabit vəzifələrinə təyin olunmaları münasibətilə tədbir keçirilib.

Bu barədə Avtosfer.az-a DİN-in mətbuat xidmətindən bildirilib. Daxili işlər naziri, general-polkovnik Ramil Usubov təyinatın şəffaf şəkildə gerçəkləşdiyini deyib. Nazirliyin Baş Kadrlar İdarəsinin rəisi, polis general-mayoru Rafiq Abbasov Nazirliyə Bakı qeydiyyatında olan 53 məzunun dəvət edildiyini bildirib, vakant vəzifələrin və namizədlərin siyahısını oxuyub.

Daha sonra püşkatma yolu ilə təyinat olub. Polisin orta rəis heyəti vəzifələrinə iddiaçı olanlar həmin vəzifələrin qeyd edildiyi xüsusi zərfləri çəkərək, ərazi polis orqanlarında vakant olan zabit vəzifələrinə təyinat alıblar.

Akademiyanı fərqlənmə diplomu və əla qiymətlərlə bitirmiş 8 məzundan 3-ü nazirliyin Baş Təşkilati – İnspeksiya İdarəsinə, 1-i Baş Cinayət Axtarışı İdarəsinə, 1-i Polis Akademiyasına, 3 nəfər isə müstəntiq vəzifələrinə təyin edilib.

Emin