Qəbələdə narkotikin təsiri altında olan sürücü 15 gün HƏBS EDİLDİ - FOTO

Qəbələ rayonunda narkotik vasitənin təsiri altında avtomobil idarə edən sürücü saxlanılıb.

Daxili İşlər Nazirliyinin məlumatına görə, Qəbələ Rayon Polis Şöbəsi Dövlət Yol Polisi Bölməsinin əməkdaşlarının keçirdikləri tədbirlər zamanı 32 yaşlı Cəmil Əhmədovun narkotik təsiri altında sükan arxasına əyləşdiyi müəyyən edilib.

Sürücü tibbi müayinədən keçirilib və onun psixotrop maddə olan metamfetamin qəbul etdiyi məlum olub. Faktla bağlı C.Əhmədov barəsində inzibati protokol tərtib olunaraq materiallar baxılması üçün məhkəməyə göndərilib.

Məhkəmənin qərarı ilə o, 15 sutka müddətində inzibati qaydada həbs edilib.

Nərmin