Sürət artdıqca qəfil yaranan təhlükələrə reaksiya azalır – DİN-dən sürücülərə ÇAĞIRIŞ

Daxili İşlər Nazirliyinin Mətbuat Xidmətinin rəisi Elşad Hacıyev sürücülərə müraciət edərək sükan arxasında sürət həddinə əməl etməyin vacibliyini vurğulayıb.

Avtosfer.az xəbər verir ki, Elşad Hacıyev sürət artdıqca qəza riskinin də əhəmiyyətli dərəcədə yüksəldiyini bildirib. Sürücünün avtomobili yavaş və məsuliyyətlə idarə etməsi isə həm yol şəraitini düzgün qiymətləndirməyə, həm də qəfil yaranan təhlükələrə, xüsusilə piyadaların qəfil yola çıxmasına vaxtında reaksiya verməyə imkan yaradır.

Sürət həddi yalnız formal qayda deyil, insanların həyat və sağlamlığını qorumağa xidmət edən mühüm təhlükəsizlik sərhədidir. Bu həddin pozulması isə ağır yol-nəqliyyat hadisələrinə və geri dönüşü olmayan nəticələrə səbəb ola bilər.

O, sürücüləri yol hərəkəti qaydalarına ciddi əməl etməyə, xüsusilə yaşayış məntəqələrində və piyadaların intensiv hərəkət etdiyi ərazilərdə daha diqqətli olmağa çağırıb. Qeyd olunub ki, təhlükəsiz sürücülük hər bir yol hərəkəti iştirakçısının həyatını qorumaq üçün əsas şərtlərdən biridir.

Eltac