Toy karvanında “BMW” ilə “drift” edən sürücünün vəsiqəsini alıb özünü həbs etdilər - VİDEO

Gəncə şəhərində yol-hərəkəti qaydalarını kobud şəkildə pozan sürücülər müəyyən olunub.

Avtosfer.az-ın məlumatına görə, Gəncə Şəhər Baş Polis İdarəsinin Dövlət Yol Polisi Şöbəsinin əməkdaşları tərəfindən keçirilən tədbirlər zamanı toy karvanında avtoxuliqanlıq edərək ictimai qaydanı nümayişkaranə şəkildə pozan, yol hərəkəti iştirakçılarına real təhlükə yaradan “BMW” markalı avtomobilin sürücüsü - M.Məmmədov saxlanılıb. Məhkəmənin qərarı ilə o, bir il müddətinə sürücülük hüququndan məhrum edilib və 15 sutka inzibati qaydada həbs olunub.

Bununla yanaşı, polis əməkdaşlarının həyata keçirdikləri nəzarət tədbirləri zamanı qanunla qadağan olunmuş səs və işıq cihazlarından istifadə edən, görməni məhdudlaşdıran vasitələr quraşdıran, dövlət qeydiyyat nişanı olmayan və digər qayda pozuntularına yol verən sürücülər də müəyyən olunublar. Onların barəsində də qanunvericiliyə uyğun tədbirlər görülüb. 

Qeyd edək ki, profilaktik tədbirlər davam etdirilir.

Nərmin