Yol polisi sürücülərə müraciət etdi - DİQQƏT

“Biz 1-ci Avropa Oyunlarının keçirilməsi zamanı xeyli yaxşı təcrübə topladıq”. Bu sözləri Modern.az-a açıqlamasında Bakı şəhər Dövlət Yol Polisi İdarəsinin bölmə rəisi, polis polkovniki Vaqif Əsədov deyib. O bildirib ki, IV İslam Həmrəyliyi Oyunları zamanı da belə nəticələr əldə olunacaq. “Şəhər sakinlərinin narahatçılığına heç bir əsas yoxdur, təhlükəsizlik tədbirləri yüksək səviyyədə həyata keçiriləcək”.

Vaqif Əsədov IV İslam Həmrəyliyi Oyunları ilə bağlı sürücülərə tövsiyə edib ki, yarışların keçirildiyi ərəfədə bacardıqları qədər şəxsi avtomobillərdən az istifadə etsinlər. “Sürücülər sarı zolaqlara daxil olmağa görə cərimlənə biləcəkləri barədə məlumatlı olsunlar. İslam Həmrəyliyi Oyunları zamanı Bakıda yük avtomobillərinin hərəkətləri məhdudlaşdırılacaq, onlar üçün istiqamət qoyulub. Yalnız günün qaranlıq vaxtlarında, gecə saat 22:00-dan səhər saat 07:00-dək həyat əhəmiyyətli olan nəqliyyat vasitələrinin, həmçinin qəza-bərpa üçün işlədilən vasitələr, eyni zamanda yanacaq daşıyan və konkret kommunal təyinatlı avtomobillərin hərəkəti icazə verilən marşrut üzrə planlaşdırılıb. Bakı qeydiyyatı olmayan avtomobillərin də  paytaxta girişinə qadağa qoyulacaq. Bölgələrdən gələn avtomobillər üçün paytaxtın şimal və cənub girişində yüksək səviyyəli dayanacaqlar var. Onlar avtomobillərini orada saxlayıb şəhərə xüsusi nəqliyyat vasitəsi ilə gələ bilərlər”.

 Vaqif Əsədov bildirib ki, sarı zolaqlar bəzi ərazilərdə kəsişir. “Sarı zolaqların kəsişdiyi  ərazilərdə  Yol Patrul Xidmətinin əməkdaşları xidmət aparıb keçmə növbəliliyin təmin edəcəklər. Sürücülərin rahat şəkildə hərəkət etməsi üçün bütün məsələlər diqqətə alınıb. Bu günə qədər ölkəmizdə müxtəlif beynəlxalq tədbirlər yüksək səviyyədə həyata keçirilib. İslam Həmrəyliyi Oyunları da yüksək səviyyədə keçiriləcək. Bakı Şəhəri Dövlət Yol Polisi IV İslam Həmrəyliyi oyunları ilə bağlı gücləndirilmiş iş rejiminə keçir”.

Bölmə rəisi İslam Oyunları zamanı yol hərəkəti və yol  təhlükəsizliyi ilə bağlı yazan KİV nümayəndələrinə də müraciət edib.  O bildirib ki, yol hərəkəti və yol təhlükəsizliyi ilə yazılan yazılara görə anlaşılmazlıq olmasın deyə, jurnalistlər bunu  Dövlət Yol Polisi ilə razılaşdırsın. “Jurnalistlər informasiya təhlükəsizliyini nəzərə alaraq, yazdıqları informasiyanı araşdıraraq yazsınlar. Yayılan yanlış informasiya ölkəmizin əleyhinə istifadə oluna bilər. Bu informasiyaların yayılmasında şəxsi mənafeyə, operativ xəbər yazmağa deyil, dövlət maraqlarının qorunmasına diqqət ayırsınlar”.

IV İslam Həmrəyliyi Oyunları ilə bağlı paytaxt yollarına çəkilmiş xüsusi sarı zolaqlara digər nəqliyyat vasitələrinin girişi qadağan olunacaq. May ayının 5-dən tətbiq olunacaq qadağaya əsasən, zolaqlara yalnız IV İslam Həmrəyliyi Oyunları Təşkilat Komitəsinin təyin etdiyi və xüsusi işarələnmiş nəqliyyat vasitələri daxil ola biləcək. Bu zolaqlara icazəsiz daxil olan nəqliyyat vasitələri 40 manat məbləğində cərimə ediləcək. Qadağa mayın 5-dən 25-nədək qüvvədə olacaq.