Yol polisi toy karvanında tərsinə gedən "Porcshe"ni nəzarətə götürdü - VİDEO

Sürücü avtomobili arxaya doğru idarə edərək digər hərəkət iştirakçıları üçün təhlükə yaradır. Bütün avtomobillər düz, ağ rəngli maşın isə eyni istiqamətdə, amma tərsinə sürülür. Sosial şəbəkələrdə yayılan bu görüntü toy karvanında lentə alınıb. Hadisənin Təhsil Nazirliyi tərəfdən Heydər Əliyev prospektinə çıxan körpüdə baş verdiyi bildirilir. Sürücü avtomobilini bir neçə dəqiqə arxa-arxaya sürməklə idarə edib.

Dəfələrlə deyilməsinə baxmayaraq, toy karvanında hərəkət edən avtomobillər qaydaları kobud şəkildə pozurlar.

Bu qayda pozuntusuna görə sürücüyə 3 bal və 60 manat cərimə tətbiq edilə bilər.

Bakı şəhər Dövlət Yol Polisi İdarəsinin şöbə rəisi Vaqif Əsədov qeyd edib ki, xüsusilə toy karvanında hərəkət edən sürücülər düşünməlidirlər ki, belə təhlükəli manevrlər yaxınlarının şad gününü yasa çevirə bilər.