Yol polisi və Dövlət Agentliyi "VAZ dairəsi" ilə bağlı yeni layihə hazırladı - RƏSMİ

Azərbaycan Avtomobil Yolları Dövlət Agentliyi ilə birgə yol polisi tərəfindən "VAZ dairəsi" kimi tanınan ərazidə yeni layihə hazırlanıb və layihə mərhələli şəkildə həyata keçirilir. Bu barədə Avtosfer.az-a Baş Dövlət Yol Polisi İdarəsinin şöbə rəisi, polis mayoru Rövşən Tağıyev məlumat verib. Bildirib ki, yeni dərs ilinin başlanması ilə bağlı yollarda sıxlıqların olması nəzərə alınaraq layihənin ilkin mərhələsi qısa müddət ərzində həyata keçirildi. Layihənin icrasının sonrakı mərhələsində mövcud yol şəraiti, istiqamətlər üzrə nəqliyyat axını tam təhlil olunaraq hərəkətin daha da təkmilləşdirilməsi istiqamətində əlavə işlərin görülməsi planlaşdırılıb: "Nəzərə almaq lazımdır ki, həmin ərazidə əvvəllər mütamadı sıxlıq müşahidə olunurdu ki, bu da sürücülərin əlavə vaxt itkisinə və əlavə yanacaq sərfiyyatına səbəb olurdu. Hazırda sürücülər bir istiqamət üzrə əlavə 2,5 kilometr məsafə qət etməklə geriyədönmə edib hərəkətlərinə davam edə bilirlər ki, bununla da tıxacda qalmadan gedəcəkləri yerə rahat gedə bilirlər. Bildirmək istəyirik ki, qeyd olunan layihə sürücülərin həmin ərazidə rahat, təhlükəsiz və əlverişli hərəkətinin təmin olunması məqsədi ilə həyata keçirilir".

Emin