Yol polisiləri məktəblilərə yol hərəkəti qaydalarından danışdı - FOTO - VİDEO

Bakı şəhər Dövlət Yol Polisi İdarəsinin əməkdaşları Sabunçu rayon DYPŞ-nin əməkdaşları ilə birgə rayonun Cəfər Cabbarlı adına 178 saylı orta məktəbində maarifləndirmə tədbirləri keçirib. Avtosfer.az xəbər verir ki, tədbirdə Bakı DYP-nin baş inspektoru polis mayoru Araz Əsgərli, İdarənin inspektoru polis leytenantı Rüstəm Əhmədli, Sabunçu rayonu Dövlət Yol Polis İdarəsinin inspektoru polis kapitanı Yaqub Piriyev və Sabunçu rayonu Dövlət Yol Patrul Xidmətinin əməkdaşları iştirak ediblər.

Məqsəd uşaqlara yol hərəkəti qaydalarını aşılamaq, onları yollardakı təhlükələrdən qorumaqdır. Bu, eyni zamanda Daxili İşlər Nazirliyinin “Diqqət, uşaqlar!” aylığı çərçivəsində keçirilən tədbirlərin bir hissəsidir. “Pedoqoji kollektivlərdən də xahiş edirik ki, bu cür tədbirlərdə yol hərəkəti təhlükəsizlik qaydalarına aid olan bütün məsələlərdə bunun həyati əhəmiyyətliliyini, xüsusilə də azyaşlı, yeniyetmə uşaqlar arasında təbliğatın son dərəcədə əhəmiyyətli olduğu nəzərə alınsın”, - məlumatda qeyd edilib.

Tədbirdə şagirdlərlə yol hərəkəti qaydaları barəsində maarifləndirici söhbətlər aparılıb. Yol polisləri müxtəlif məlumatlar ətrafında məktəbliləri sorğu-sual edib və onların bilik və bacarıqlarını yoxlayıblar. Eyni zamanda məktəbin önünə DYP tərəfindən hazırlanmış məlumat lövhələri vurulub.