Yol polislərinə verilən cərimə faizi ləğv olunur?

Bir neçə aydır yol polisi əməkdaşlarının cərimələrdən əldə olunan faizləri ala bilməməsi ilə bağlı “Azadlıq” qəzetində məlumat yayılıb. Sözügedən məlumatda hətta faiz sisteminin yaxın zamanlarda ləğv olunacağı da bildirilir. Bunun səbəbi isə hazırkı iqtisadi durumla əlaqələndirilir. “Qafqazinfo” yayılan məlumatla bağlı Baş Dövlət Yol Polis İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyevlə əlaqə saxlayıb. O bildirib ki, hansısa yol polisi əməkdaşının əməkhaqqına əlavə olunan faiz məbləğini almaması barədə quruma məlumat daxil olmayıb: “Ola bilər ki, kimsə məzuniyyətdə olduğu üçün ala bilməyib. Çünki məzuniyyət dövründə hesablanmır. Amma məbləğ qalan bütün əməkdaşların maaşına əlavə olunub. Kiminsə belə bir problemi varsa, məsələni ictimailəşdirməzdən əvvəl ondan yuxarı vəzifə tutan şəxslərə raportla məlumat verməlidir”.

Cərimə faizi məsələsinin ləğv olunması məsələsinə gəlincə isə K. Əliyev bundan məlumatlı olmadığını nəzərə çatdırıb: “Bununla bağlı qanunvericiliyə dəyişiklik edilib-edilməyəcəyi barədə məlumatlı deyiləm. Bilirsiniz ki, cərimələrdən əldə olunan vəsaitin 25 faizinin əmək haqqına əlavə edilməsi ilə bağlı cənab prezident tərəfindən sərəncam verilmişdi”.