Taksi xidmətlərindən istifadə edənlər! - MÜTLƏQ OXUYUN

Son illər paytaxt Bakıda taksi xidmətlərindən istifadə edənlərin sayında artım var. Ötən ilin göstəriciləri ilə müqayisədə, bu ilin ilk yanvar-fevral aylarında taksi xidmətlərindən istifadə edən sərnişinlərrın sayı 3,9%- i təşkil edib. Maraqlıdır, görəsən taksi xidmətlərini bu qədər cazibədar edən hansı keyfiyyətlərdir?

Yol nəqliyyatı eksperti Elməddin Muradlı Redaktor.az-a açıqlamasında bildirib ki, ictimai nəqliyyatlarda intervalın düzgün qurulmaması və sistemin düzgün işləməməsi taksi xidmətinə marağı artırır: “Sərnişinlərin taksi xidmətinə üstünlük verməsinin əsas səbəbi ictimai nəqliyyatların bərbad vəziyyətdə olmasıdır. Təəssüf ki, ictimai nəqliyyatda vəziyyət qənaətbəxş deyil. İstismara yararsız avtobuslar xəttədir, psixoloji gərginliyi yüksək olan, sərnişinə "30 qəpik" gözü ilə baxan şəxslər sürücülük edirlər. Bu cür neqativ hallara görə imkanı olan şəxslər avtomobil alır, imkanı aşağı olanlar isə taksi xidmətindən istifadə etmək məcburiyyətində qalır".

Pik saatlarda dayanacaqlarda avtobuslardan çox, taksilər dayanır. "Bəzən insanlar 50-60 qəpiyə gedə biləcəyi yolu məcburən, taksi ilə 3-4 manata getməli olurlar. Avtobuslarda intervalın düzgün müəyyən edilməməsi sıxlığa yol açır. O dərəcədə ki, pik saatlarda yaranan sıxlıq nəticəsində əksər insanlar vaxtında ünvana çata bilmirlər. Bu halda 3-4 nəfərin birləşərək, hərəyə 1-1,5 manat (məsafədən asılı olaraq qiymət dəyişir) verərək, taksi xidmətinə müraciət etməsi ən uyğun variant olur. Bax, taksilərin cazibəsinə, əsasən bu amil təsir etmiş olur"

Sifarişli taksi xidməti ölkəmizdə yeni xidmət növü hesab olunur. 

"Əvvəllər sifarişlə taksi çağırmaq geniş yayılmamışdı. İndiki halda, təlabatın yüksək olduğunu görən müəyyən imkanlı adamlar, gələcəkdə bu sahədə problemlər yarada bilərlər. Çünki maddi imkanları yüksək olan taksi şirkətləri, qiymətləri müəyyən bir həddə qədər endirib, digər xidmət ocaqlarını sıradan çıxara bilərlər. Buna nail olduqdan sonra, avtomatik olaraq qiyməti diqtə edən tərəfə çevrilən bu xidmət şirkətləri, gediş haqlarını indikindən bir neçə dəfə artıq olan həddə gətirə bilərlər. Nəticədə, itirən yenə də vətəndaş olacaq".

Taksi xidməti həyata keçirən sürücülərə ciddi nəzarət edilməlidir.

Müştərinin əlaqə nömrəsi taksi sürücüsündə olmamalıdır. Bu məsələdə xüsusən də xanım sərnişinləri nəzərə almaq lazımdır. Bir sıra hallarda, taksi sürücüləri xanım sərnişinlərə sonradan tanışlıq təklifi edir və ya taksi xidməti lazım olarsa, məhz ona müraciət etməsini xahiş edir. Bu, qətiyyən düzgün hal deyil. Digər tərəfdən, taksi sürücüləri  normal şəkildə təlimatlandırılmalıdır. Taksi xidmətindən istifadə edən sərnişinə, sifariş öncəsi müəyyən məlumatlar göndərilməlidir. Təyin edilən avtomobilin komfortlu olub-olmaması, sürücünün şəkli və.s kimi informasiyalar verilməlidir”.