30-dan çox cəriməsi olan sürücü əks yola çıxıb qəza törətdi – Özü və ailəsi öldü - FOTO - VİDEO

Rusiyanın Tambov vilayətində ailə faciəsi yaşanıb. Avtosfer.az xəbər verir ki, yüksək sürətlə hərəkətdə olan minik avtomobilinin yük maşını ilə toqquşması nəticəsində bir ailənin dörd üzvü həyatını itirib.

Məlumata görə, "BMW X5" markalı avtomobilin sürücüsü yüksək sürətlə ötüb keçmə əməliyyatı yerinə yetirərkən öz zolağına qayıtmağa imkan tapmayıb. Əks zolağa çıxan maşın qarşıdan gələn ağır tonnajlı yük avtomobili ilə toqquşub.

Zərbənin gücündən "BMW" deformasiyaya uğrayıb. Qəza nəticəsində sürücü, onun həyat yoldaşı və iki uşağı aldığı ağır xəsarətlərdən hadisə yerindəcə dünyasını dəyişib. Yük maşınının sürücüsü isə qəzadan xəsarətsiz ötüşüb.

Aparılan ilkin araşdırmalar zamanı məlum olub ki, sükan arxasında olan və ailəsi ilə birgə həlak olan sürücü xroniki qayda pozanı olub. Onun təkcə bu il ərzində sürət həddini aşdığına görə 30-dan çox protokolu və cəriməsi qeydə alınıb.

Faktla bağlı hüquq-mühafizə orqanları tərəfindən təhqiqat aparılır.

Namiq Musayev