Bakıda cərimə meydançasında 51 maşın yandı - VİDEO

Bakının Nizami rayonundakı Baş Dövlət Yol Polisi İdarəsinə məxsus 11 saylı cərimə meydançasında yanğın baş verib. 3 hektara yaxın ərazidə quru otluq sahə yanıb. Nəticədə cərimə meydançasında saxlanılan 50-dən çox avtomobil yanıb. Yanğın yanğınsöndürənlər tərəfindən söndürülüb və yaxınlıqdakı evlərə keçməsinin qarşısı alınıb.

Hadisə yerinə 6-dan çox yanğınsöndürmə maşını və Dövlət Yanğından Mühafizə Xidmətinin 70-dən çox şəxsi heyəti cəlb olunub.

Avtosfer.Az xəbər verir ki, Fövqəladə Hallar Nazirliyi avtomobil dayanacağında baş verən yanğın barədə növbəti məlumat yayıb. FHN-dən REAL-a daxil olan məlumatda bildirilir ki, Bakı şəhəri Nizami rayonu Mikayıl Əliyev küçəsində yerləşən avtomobil dayanacağı kimi istifadə olunan ərazidə 3,7 ha quru ot və 51 ədəd müxtəlif markalı minik avtomobilinin (əksəriyyəti qəzaya uğramış və istismara yararsız vəziyyətdə olan) yanar hissələri yanıb. Ərazidə olan təxminən 200 ədəd müxtəlif markalı minik avtomobili və yaxınlıqdan keçən neft boru kəmərləri yanğından mühafizə olunub. Yanğın zamanı xəsarət alan olmayıb.