Çökmüş yolu düzəldən yoxdur: Sürücülər təhlükə ilə üz-üzə qalıb - VİDEO

Xırdalanda yolda yaranan problem sürücülərin və sərnişinlərin həyatına təhlükə yaradır. Avtosfer.az-ın verdiyi məlumata görə, Heydər Əliyev prospektində (Heydər Parkının qarşısında) asfalt qatı çöküb və bu problem indiyədək həll olunmamış qalır. Sözügedən ərazidə yaranan vəziyyət sürücülər üçün gözlənilməz təhlükələr yaradır. Çünki əksər sürücülər yolda olan çökməni vaxtında görmədikləri üçün avtomobilləri ilə bu hissəyə düşərək qəza vəziyyəti ilə üzləşirlər.

Qeydə alınan və mövcud vəziyyəti əks etdirən videodan da görmək olur ki, "Toyota Prius" markalı avtomobilin sürücüsü bu problemdən xəbərsiz olduğu üçün çökmüş hissəyə düşür. Bu isə həm sürücü, həm sərnişinlər, həm də digər hərəkət iştirakçıları üçün böyük təhlükə yaradır.

Əldə etdiyimiz məlumata görə, yolda yaranmış bu problem artıq 10 gündən çoxdur mövcuddur. Lakin aidiyyəti qurumlar tərəfindən məsələnin aradan qaldırılması üçün heç bir addım atılmayıb. Bu laqeydlik nəticəsində sürücülər hər gün eyni risklə qarşılaşır, həmçinin avtomobillərin texniki vəziyyətinə də ziyan dəyir.

Təmir işlərinin gecikməsi isə problemin böyüməsinə və daha ciddi nəticələrin ortaya çıxmasına səbəb ola bilər.

Könül Rauf