Geniş yollarda və dairələrdə tıxac belə yaranır - Hamının marağına səbəb olan - VİDEO

Yollarda yaranan tıxaclar bəzən gözlənilməz səbəblərdən qaynaqlanır. Sosial şəbəkələrdə yayılan və sürücülərin marağına səbəb olan bir videoda bunun real nümunəsi əks olunub. 

Avtosfer.az xəbər verir ki, kadrlarda 40 kilometr-saat sürətlə hərəkət edən avtomobillərdən birinin sürücüsünün gərəksiz yerə tormoz verməsi nəticəsində dairəvi yolda necə zəncirvari tıxacın yarandığı göstərilir.

Bu cür tıxaclar "dalğa effekti" və ya "Fantom tıxac" adlanır. Yolda bir sürücünün qəfil sürəti azaltması və ya tormozlaması arxadan gələn digər avtomobillərin də reaksiya verməsinə səbəb olur. Bu reaksiya zəncirvari şəkildə davam edir və nəticədə heç bir konkret maneə olmadan böyük tıxaclar yaranır.

Ekspertlər bildirir ki, bu cür tıxacların qarşısını almaq üçün sürücülər yol hərəkətində daha diqqətli olmalı, qəfil əyləcdən çəkinməli və axıcılığı qorumağa çalışmalıdırlar. Əks halda, bir avtomobilin ani və gərəksiz tormoz verməsi bütöv yol hərəkətini iflic edə bilər.

Eltac Zülfüqaroğlu