Qayda pozub polisdən qaçan gənc sürücü sürəti 160-a qaldırdı – Qəzada 4 aylıq körpə... - VİDEO

Yol hərəkəti qaydasını pozduğu üçün polisdən qaçan sürücü ağır qəzaya səbəb olub. Avtosfer.az xəbər verir ki, ABŞ-ın Arkanzas ştatında baş verən hadisə polis avtomobilinin kamerasına düşüb. Arkanzas Ştat Polisi qayda pozuntusuna görə bir yolsuzluq avtomobilini (SUV) saxlamağa çalışıb. Lakin maşının sükanı arxasında olan 28 yaşlı sürücü polisin tələbinə məhəl qoymayaraq sürəti saatda 160 km-dən yuxarı qaldırıb və yayınmağa başlayıb.
Polisin həyata keçirdiyi xüsusi taktiki müdaxilə (PIT Manevri) nəticəsində sürücü idarəetməni itirib və nəqliyyat vasitəsi işıq dirəyinə çırpılaraq aşıb.
Avtomobilin bir neçə dəfə yuvarlandığı zaman 4 aylıq bir körpə maşından çölə fırlanıb. Nəqliyyat vasitəsinin salonunda olan və yaşları 6-dan aşağı olan digər 3 uşaq isə polislər tərəfindən salondan çıxarılıb.
Qəza nəticəsində hər dörd uşaq hadisəni yüngül xəsarətlərlə ötüşdürüb. Onlar dərhal tibb mərkəzinə çatdırılaraq müayinə və müalicə altına alınıblar.
Faktla bağlı sürücü barəsində cinayət işi açılıb və araşdırma davam edir.
Xatırladaq ki, ABŞ-də PIT Manevri polis təqibi zamanı qaçan nəqliyyat vasitəsini təhlükəsiz şəkildə idarəetmədən çıxarıb dayandırmaq üçün tətbiq edilən xüsusi toxunma taktikasıdır.
Sözügedən hadisənin anbaan videosunu təqdim edirik:

Namiq Musayev