Ağac altında park edilən avtomobillər üçün daha bir təhlükə - FOTO

Yayda bir çox sürücü avtomobilin “kölgələnməsi” üçün yer axtarır ki, salon qızmasın, boya solmasın. Buna görə də, sürücülər maşını imkan daxilində ağac kölgəsindəs axlamağa çalışırlar. Xüsusən də rayonlarda. Lakin, bunun pis tərəfi də var. 

Avtosfer.az xəbər verir ki, söhbət təkcə hansısa budağın qırılıb sığorta hadisəsi yaratmasından getmir. Əsas məsələ quşlarla bağlıdır. Quşlar avtomobilin üzərini çirkləndirdikdə isə tam başqa proses baş verir. 

Kimyəvi tərkibinə görə quş zılı çox aqressiv maddədir. Onun tərkibində güclü üzvi turşu və abraziv materiallar mövcuddur. İsti havada kapotun üstünə düşən zıl sürətlə reaksiyaya girərək boyanı dağıdır. 

Lakin, daha böyük xətanı avtomobil sahibləri bilmədən edirlər. Onlar avtomobilin üzərindəki quş zılını quru əski ilə təmizlədikdə kimyəvi dağılma ilə yanaşı, abraziv materiallar da boyanı cızır. Bununla da boyanın dağılması sürətlənir. Bəs düzgün çıxış yolu hansıdır?

Ən səmərəli üsul quş zılının üzərinə nəm əski qoyaraq yumşalmasını gözləmək, sonra isə ehtiyatla təmizləməkdir. Daha tez nəticə almaq üçün qazlı sudan istifadə etmək olar.  

Bütün hallarda maşını yayda vaxtaşırı yumaq lazımdır ki, toz avtomobilin boya örtüyünü korlamasın.

Vüqar Yaşaroğlu