Avropalı ekspert: çinli istehsalçılar yaponların yolu ilə gedirlər

Çinin avtomobil istehsalçıları yaponların 70-80-ci illərdə etdiyi strateji gedişləri təkrarlayırlar.

Avtosfer.az xəbər verir ki, bu qənaətə fransız avtomobil eksperti Jak Luis gəlib. Ekspert bildirir ki, 70-ci illərdə yapon avtomobilləri qlobal miqyasda çox da ciddi maraq doğurmurdu. Lakin bazarın öyrənilməsi, ağıllı qiymət siyasəti və keyfiyyət sayəsində 80-ci illərin ortalarından yaponlar bazarda lider ola bildilər.

Avtomobil mütəxəssisi qeyd edir ki, 70-ci illərin sonunda yaponlar ABŞ bazarına girərkən yerli istehsalçılar onlara rişxənd edidilər (“Toyota”ya rişxəndlə deyilmiş “toy auto”, yəni oyuncaq avtomobil məsələsini çoxları xatırlayır – müəl.). Lakin 80-ci illərin əvvəllərində kompakt və qənaətcil yapon avtomobilləri ağır, yanacağı sözün həqiqi mənasında içən Amerika avtomobillərini sıxışdıranda artıq gec idi. “Toyota” başladığı “hücumu” sonradan “Nissan”, “Honda”, “Mazda” və “Subaru” davam etdirdi. Hər bir marka bütövlükdə Amerika bazarına öz yeniliyini gətirdi. İndi isə onları bazardan çıxarmağı heç kim düşünmür və bu ümumiyyətlə mümkün də deyil.

Jak Luis vurğulayır ki, hazırda Çinin avtomobil sənayesi konsolidasiya dövrünü yaşayır. Əksər markalar sıradan çıxacaq, bir neçə brend bazarda möhkəmlənəcək. Bazarda qala bilmək üçün keyfiyyətin artırılması mütlədir.

Vüqar Yaşaroğlu