Azərbaycana gətirilən maşınlar standartlara cavab vermir - EKSPERTDƏN AÇIQLAMA

“Təbii ki, dünyanın müxtəlif ölkələrindən Azərbaycana avtomobil idxalı olur. O cümlədən də bu avtomobillərin son illər ərzində Çindən gətirildiyi müşahidəmizdən kənarda deyil”. Bu sözləri açıqlamasında nəqliyyat eksperti Eldəniz Cəfərov deyib.

O, bildirib ki, Çindən gətirilən avtomobillərin çoxluğunu Rusiyanın avtomobil sənayesinin çökməsi əlaqədar edir:

“Əvvəllər ölkəmizə gətirilən avtomobillərin əksəriyyətini Rusiya təşkil edirdi. Lakin Rusiya avtomobil sənayesinin çökməsi nəticəsində bu prosesin rəhbərliyi Çinin üstünə düşdü. Doğrusu, avtomobilin harada istehsal olunması o qədər də əhəmiyyət kəsb etmir. Əsas avtomobilin hansı standartlar əsasında istehsal olunmasıdır. Əsasən, Azərbaycan avtomobil seqmentində Avropa spesifikasiyasına aiddir, yəni bizim ölkəmizə göndərilən avtomobillərin hamısı Avropa standartlarına cavab verməlidir”.

Onun sözlərinə görə, Çindən Azərbaycana gətirilən avtomobillər də Avropa standartlarına uyğun olmalıdır:

“Təbii ki, Çin və digər ölkələrdə də Avropa standartlarına uyğun avtomobillər istehsal olunur. Yaxşı olar ki, Çindən Azərbaycana gətirilən avtomobillər Avropa standartlarına uyğun olsun. Bu gün çox ,təəssüf ki, Çindən gətirilən avtomobillərin bir qismi bu standartlara uyğun deyil. Əlbəttə ki, Bakıdaxili tıxaclar çox olur. Bu avtomobillərin gətirilməsi də, sözsüz ki, bunlara çox təsir edəcəkdir”.

(Yeniçağ)