Azərbaycanda Çin avtomobilləri sürətlə çoxalır - RƏQƏMLƏR

Ötən il Azərbaycana idxal olunan yeni avtomobillərlə bağlı statistik göstəricilər açıqlanıb. 
Avtosfer.az xəbər verir ki, Çin avtomobillərinin qiymət baxımından əlçatan olması, elektrik və hibrid modellərin artması, eləcə də texnoloji üstünlüklər bu markalara marağı xeyli artırıb.

Bu tendensiyanın yaxın illərdə də davam edəcəyi proqnozlaşdırılır.
Yeni avtomobillər arasında ən çox idxal edilən model “BYD Destroyer 05/Chazor” olub. Sözügedən model üzrə ölkəyə 10 186-dan çox avtomobil gətirilib. İkinci pillədə “Changan UNI-Z” qərarlaşıb (9 509 ədəd). Üçüncü yerdə isə “Nevo A05” modeli yer alıb (6 803). İlk beşlikdə həmçinin “Nevo Q07” (5 094) və “Nevo Q05” (3 250) modelləri də var. 
Siyahıda “BYD Seal 05”, “Toyota Corolla Cross”, “Changan CS55”, “BYD Qin Plus” və “Chevrolet Cobalt” kimi modellər də yer alır. 
Qeyd olunur ki, bəzi modellər üzrə idxal əvvəlki illə müqayisədə əhəmiyyətli artım göstərib. Markalar üzrə statistika da Çin avtomobil istehsalçılarının bazarda ciddi pay qazandığını göstərir. “BYD” ötən il 15 535 avtomobillə birinci olub. Onu “Nevo” (15 399) və “Changan” (13 386) izləyir. Dördüncü yerdə “Toyota” (6 926), beşinci pillədə isə “Hyundai” (1 889) qərarlaşıb. İlk onluqda həmçinin “Chevrolet”, “Geely”, “Li Auto”, “JAC” və “KIA” markaları da yer alıb./sfera.az