"Bugatti"nin ən nadir modellərindən biri satışa çıxarılacaq

"RM Sotheby's" hərrac evi aprelin sonunda "Bugatti" markasının ən nadir modellərindən birini satışa çıxaracaq.

Avtosfer.az hərrac evinin rəsmi saytına istinadən xəbər verir ki, söhbət 1990-cı illərin ikinci yarısında cəmi üç ədəd istehsal olunmuş "Bugatti EB112" modelinin sonuncusundan gedir.

Dördqapılı fastbek üslublu bu avtomobil ümumi yollarda istifadə üçün qeydiyyatdan keçsə də, təxminən 30 il ərzində cəmi 388 kilometr yol qət edib. Kolleksiya nümunəsinin 1.5-2 milyon avro arasında qiymətə satılacağı gözlənilir.

Satışa çıxarılan avtomobil 2015-ci ilə qədər Gildo Pastorun mülkiyyətində olub, hazırda isə ikinci sahibi tərəfindən satışa təqdim edilib. Hərrac təşkilatçıları bildirirlər ki, bu satış müasir tarixdə faktiki olaraq yeganə "Bugatti" sedanına sahib olmaq üçün unikal imkandır.