Dilləri ayrı, davranışı eyni olan maşın dəllalları

Avtomobillərin dilerdənkənar ixracı qeyri-adi hal deyil. Lakin ilk baxışda sadə görünən proses sonradan istehlakçı üçün problem mənbəyinə çevrilər bilir. Bunun bir nümunəsinə də Afrikanın ən böyük avtomobil istehsalçısı Mərakeşin timsalında baxaq.

Avtosfer. az xəbər verir ki, krallıqda “Volkswagen”in rəsmi nümayəndəliyi olsa da, konsernin istehsal etdiyi elektromobillər bura rəsmi şəkildə idxal edilmir. Diler məsələyə ilk vaxtlar ciddi yanaşmasa da, sonradan çoxsaylı müraciətlərə cavab verməyə məcbur oldu. Məsələ burasındadır ki, maşın alverçiləri ölkəyə kütləvi şəkildə “Volkswagen”in istehsalı olan elektromobil gətiriblər.

Müştərilər isə arxayın edilib ki, konsernin rəsmi servisində bu texnikanın təmiri mümkündür (hörmətli oxucu yəqin ki, afrikalı və azərbaycanlı dəllalların davranışındakı eyniliyi sezdi) . Rəsmi servis mərkəzində yoxlama zamanı bu maşınların demək olar hamısının Britaniyadan gətirildiyi və həmin ölkənin standartlarına uyğun olduğu üzə çıxıb.

Başlıca problem sağ sükandır ki, bunu da yerli alverçilərimizin dili ilə desək, “perekidka” ediblər. Rəsmi nümayəndəlik Afrika bazarına müvafiq modellər hazırlanmadığı üçün hələ ki elektromobil ixrac etmədiyini bildirib. Eyni zamanda qeyri-rəsmi kanallarla idxal olunan maşınlara texniki xidməti qadağan edib.

Vüqar